|
O pasado xoves, 22 de marzo de 2012, reuníronse na Excma. Deputación de Ourense o Alcalde e o Teniente de Alcalde de Amoeiro co Presidente desta administración provincial. O obxecto da reunión era acadar un compromiso concreto -con prazos, datas e actuacións- para que a Deputación acometese a tarefa de acondicionar as estradas deste organismo no noso municipio.
A reunión, desenvolvida nun clima de cordialidade, rematou co acordo do Presidente de proporcionar, en breve, una resposta clara ás necesidades sinaladas. Tales necesidades aparecen reflectidas na moción que presentou o PSdeG-PSOE no Pleno Municipal de data 1 de marzo de 2012, a cal foi aprobada por unanimidade. En canto se reciba, dita resposta será trasladada á cidadanía do Concello de Amoeiro.
 A continuación, amósase unha foto da antedita reunión e o texto íntegro da referida moción que foi a base sobre a que se articulou o encontro na Deputación Provincial de Ourense.
Agrupación Local de Amoeiro do Partido dos Socialistas de Galicia – Partido Socialista Obrero Español
Portavoz: Adolfo González Nóvoa
MOCIÓN
|
URXENTE REPARACIÓN E ACONDICIONAMENTO DE VIARIOS TITULARIEDADE DA EXCMA. DEPUTACIÓN PROVINCIAL DE OURENSE NO CONCELLO DE AMOEIRO
|
Moción presentada no Concello de Amoeiro a proposta do Agrupación Local de Amoeiro do Partido dos Socialistas de Galicia – Partido Socialista Obrero Español.
EXPOSICIÓN DE MOTIVOS
A Lei 4/1994, de 14 de septiembre, de Estradas de Galicia desenvolve, a partires de art. 148.1.5 da Constitución Española, o precepto de que as Comunidades Autónomas poden asumir competencias en materia de estradas cando o itinerario se desenvolva íntegramente no seu territorio, e atribúe as deputacións no art. 11 a responsabilidade de elaborar, redactar –así como modificar- e aprobar inicialmente os plans provinciais que permitan materializar as estradas titulariedade das devanditas deputacións.
Por outra banda, a Lei 7/1985, de 2 de abril, de Bases de Réxime Local sinala no artigo 36 que son competencias propias da deputación as que lle atribúan as leis do estado e a comunidade autónoma de referencia nos diferentes sectores da acción pública e, en todo caso, a prestación de servizos públicos de carcácter supramunicipal (apartado c), e a cooperación no fomento do desenvolvemento económico e social e na planificación do territorio (apartado d).
En suma, a lexislación asigna un relevante papel ás deputacións na prestación de servizos que exceden o marco municipal e, particularmente, no desenvolvemento económico e na planificación do territorio, aspectos todos eles nos que xogan un papel clave as estradas de titulariedade provincial, que constitúen, deste xeito, unha responsabilidade da deputación que debe velar tanto polo seu adecuado mantemento como pola elaboración, redacción e/ou modificación de plans provinciais referidos á planificación deste tipo de infraestruturas de vertebración e desenrolo territorial.
O Concello de Amoeiro é consciente do indiscutible valor das vías de comunicación supramunicipal para o seu desenvolvemento, e considera que este está severamente limitado a causa do estado de infra-dotación e mala conservación das mesmas. En efecto, este territorio carece de viarios de comunicación autonómicos e estatais, e comunícase coa ciudade de Ourense e cos concellos limítrofes (Cea, Coles, Maside, Punxín e Vilamarín) únicamente mediante estradas de titulariedade da Excma. Deputación de Ourense, todas elas estreitas, sen pintar ou coa pintura practicamente desaparecida, con firmes irregulares, carentes de beirarrúas, con sinalización horizontal deficiente ou inexistente, coas cunetas sen limpar e –en algúns casos- inacabadas dende anos atrás a pesares dos retranqueos aceptados pola veciñanza (este último é o caso da estrada OU-0522 que une Parada con Ourense a través de Santa Cruz de Arrabaldo). Tal abandono é inaceptable, e correspóndelle a Excma. Deputación de Ourense a responsabilidade de adecuar os seus viarios de comunicación supramunicipal do Concello de Amoeiro cos concellos que ó rodean sen máis dilacións. Agravando a situación, débese ter en conta que Amoeiro é un municipio limítrofe coa cidade de Ourense e se atopa incluído no Plan de Transporte Metropolitano, sendo imposible manter uns mínimos de seguridade viaria ó engadir tráfico de autobuses a súa pésima rede de estradas de comunicación co entorno da cidade.
Tan penosa situación foi comunicada en repetidas ocasións, tanto persoanlmente como por escrito, á Presidencia da Excma. Deputación Provincial de Ourense, sen recibir solución algunha. Sirvan de exemplo ao respecto, os escritos remitidos a devanditaPresidencia en abril de 2008, novembro de 2009 e xuño de 2011 nos que se sinalaban múltiples deficiencias de mantemento, conservación e seguridade das estradas de titulariedade provincial. En concreto, e remitíndonos á última comunicación escrita, é aínda preciso realizar as seguintes accións nas estradas provinciais que a continuación se señalan:
- Medidas urxentes a desenvolver pola Deputación provincial de Ourense na estrada OU-0522
Esta estrada, que se nomea como OUR-CV-98 nos mapas topográficos, percorre o concello nunha lonxitude aproximada de 6 quilómetros, comunicando os núcleos de Parada, Portecelos, Rairo, A Povoanza, O Formigueiro, Albeiros, Trasalba e Soutomanco, dende os que conflúe co límite do concello de Ourense. Tal viario recibiu, anos atrás, a aceptación de ancheado por parte dos veciños afectados, e a día de hoxe sigue coa mesma anchura de fai anos e cos problemas de sempre: sinalización horizontal case inexistente e de ínfima calidade, sen beirarrúas ó seu paso polos núcleos, carente de pintado nos seus marxes e zona central, e coas cunetas sen drenar. Por todo elo, solicítase con extremada urxencia:
a) O ancheo de toda a estrada pendente dende fai anos.
b) A limpeza de cunetas e canalización de pluviais ó longo de toda a vía.
c) A realización das oportunas beirarrúas ó paso da estrada polos núcleos
d) A adecuada sinalización de toda a vía.
- Medidas urxentes a desenvolver pola Deputación provincial de Ourense na estrada OU-0524
Esta estrada, que se nomea como OUR-CV-409 nos mapas topográficos, percorre o concello nunha lonxitude aproximada de 6,750 quilómetros, atravesando dende o concello de Punxín –no Viñao- ós núcleos de O Burguete, O Fontao, A Pica, Parada, Os Casares, San Marcos e Amoeiro ata o límite co concello de Vilamarín. Trátase da principal e máis transitada arteria de comunicación do municipio, e conta cos seguintes déficit:
- Pintado case inexistente e/ou deficiente, debendo repintarse toda a estrada e, con maior urxencia, nos pasos elevados e de peóns do núcleo de Amoeiro.
- Graves limitacións para a circulación peonil, xa que ó longo da estrada non existe espazo para transitar os peóns (coa perigosidade que ocasiona); en canto as zonas urbanas falta unha zona de beirarrúa xa solicitada e pendente de asignación na entrada de Amoeiro, mentres que noutras zonas da capitalidade e de Parada as beirarrúas son moi deficientes ou inexistentes, cun estado penoso e sen as canalizacións de pluviais correspondentes; a todo elo hai que engadir que as pluviais da estrada o seu paso por Amoeiro parecen estar conectadas a rede de saneamento, causando que as fosas se desborden o cal é inaceptable e debe modificarse con urxencia.
- A todo elo súmase o problema do exceso de velocidade, que demanda a colocación de pasos elevados en Parada, reiteradamente solicitados pola veciñanza e apoiados por este concello, dando lugar unicamente a colocación provisional de pasos peonís de caucho en espera dos aínda non instalados pasos peonís de asfalto.
- Ausencia de ancheo da estrada no tramo último de Punxín; en concreto, a partires da ponte do Viñao, dando lugar a uns quilómetros finais tortuosos que acaban nun cruce extremadamente perigoso que é un auténtico punto negro viario.
- Finalmente, a sinalización horizontal é inexistente (no tramo entre O Viñao e Os Casares) ou moi insuficiente dende ese lugar.
Polo tanto son necesarias as accións de pintado, creación de espazos para peóns e beirarrúas, arranxo de pluviais, creación de pasos elevados en Parada, ancheo do tramo final da estrada entre Viñao e Punxín e instalación da debida sinalización horizontal. Aínda que poderían engadirse máis accións –como as referidas a supresión de barreiras, creemos que as mencionadas son as mínimas e necesarias a desenvolver no momento actual.
- Medidas urxentes a desenvolver pola Deputación provincial de Ourense na estrada OU-0525
Esta estrada, que se nomea como OUR-CV-102 nos mapas topográficos, percorre o concello nunha lonxitude aproximada de 7,500 quilómetros, atravesando dende Cambeo no concello de Coles ata Fontefría en Amoeiro, pasando polos seguintes núcleos deste municipio: Bóveda, Outeiro, Os Bispos, Liñares, Arcos e Fontefría. Nesta estrada atopamos os seguintes problemas:
- Ausencia de beirarrúas en toda a estrada, sen existir ningunha nos tramos urbanos, sendo particularmente necesarias e moi demandadas no núcleo de Bóveda que conta con grandes rectas e carece de espazo para circular os peóns, co conseguinte perigo de accidentes para os viandantes.
- Sinalización horizontal extremadamente deficiente, ben debido a súa inexistencia ou ben debido a súa escasa visibilidade a causa do desgaste da pintura.
Polo tanto, a acción máis necesaria e urxente é a referida a construción de beirarrúas na zona urbana de Bóveda e a creación de espazos para peóns en toda a estrada (xa que agora só hai espazo para os vehículos, non para as persoas), seguido do acondicionamento do firme en Fontefría e o pintado de toda a zona e a sinalización horizontal.
- Medidas urxentes a desenvolver pola Deputación provincial de Ourense na estrada OU-0526
Esta estrada, que se nomea como OUR-CV-57 nos mapas topográficos, percorre o concello nunha lonxitude aproximada de 3,250 quilómetros, abarcando dende o límite de Ourense pola estrada de Vilar das Tres ata Amoeiro, percorrendo os núcleos de Liñares, As Quintás, Afonsín e o propio Amoeiro. Os principais problemas nesta estrada son:
- Ausencia completa de beirarrúas e/ou espazo para peóns (non existen beiravías), que é particularmente preocupante por elevado número de peregrinos que a atravesan xa que por ela transitan realizando o Camiño de Santiago.
- Ausencia de pintado, que agrava o problema anterior.
- Necesidade de ensanchar a ponte de As Tabernas, nas Quintás, xa que é tan estreita que é moi difícil e perigoso o paso simultáneo de dous vehículos, sendo imposible si un deles é de tamaño superior a un coche. Ademais, carece de espazo para peóns.
- Cunetas sucias e tubos atascados, que causan inundacións nos baixos de As Quintás.
- Pedra sinalizadora da ruta do Camiño de Santiago nun lugar moi perigoso, a saída dunha curva tras a ponte de As Tabernas, que debe retirarse a un sitio máis seguro.
- Sinalización horizontal moi deficiente
En definitiva, e por orde de prioridade, deben crearse beiravías para peregrinos e peóns, anchear a ponte de As Tabernas, limpar cunetas e desatascar tubos en As Quintás, pintar toda a estrada, cambiar a unha ubicación menos perigosa a pedra sinalizadora da ruta do Camiño de Santiago e mellorar a sinalización horizontal.
- Medidas urxentes a desenvolver pola Deputación provincial de Ourense na estrada OU-0523
Esta estrada, que se nomea como OUR-CV-101 nos mapas topográficos, une o concello de Amoeiro ó de Maside percorrendo, nunha lonxitude aproximada de 3,250 quilómetros, os núcleos de Parada, a Pica e Santabaia. Nesta estrada aprécianse os seguintes problemas:
- Estrada demasiado estreita para o tráfico, e sen beiravías.
- Firme en mal estado e sen pintar ou con pintura en mal estado.
- Ponte sobre o Barbantiño moi estreito para o paso simultáneo de vehículos e sen espazo para peóns.
En suma, as accións prioritarias inclúen o ensanche e pintado da estrada –creando as correspondentes beiravías-, e a ampliación da sección da ponte sobre o Barbantiño.
- Medidas urxentes a desenvolver pola Deputación provincial de Ourense na estrada OU-0526
Esta estrada, que se nomea como OUR-CV-461 nos mapas topográficos, une o concello de Amoeiro co de Ourense na zona de Trasalba, e conta cunha lonxitude aproximada de 1,250 quilómetros. É a estrada de menor lonxitude de todas as mencionadas, e posto que está moi unida ó desenvolvemento do transporte metropolitano urxe o seu repintado e ancheamento (coa correspondente creación de beiravías).
A todo elo, poden engadirse recollidas de firmas veciñais das parroquias de Bóveda e Parada de Amoeiro nos que se demandaban, respectivamente, beirarrúas e pasos peonís elevados destinados a mellorar a seguridade viaria.
En consideración de todo o exposto, a Agrupación Local de Amoeiro do Partido dos Socialistas de Galicia – Partido Socialista Obrero Español PROPÓN AO PLENO A ADOPCIÓN DO SEGUINTE ACORDO:
Instar á Excma. Deputación Provincial de Ourense -como organismo responsable do coidado, mantemento e mellora das estradas provinciais que transcorren polo concello de Amoeiro e que son os únicos viarios de comunicación supramunicipal deste concello-, a proporcionar por escrito e no prazo máximo dun mes accións concretas dirixidas a solucionar os problemas expostos, ben directamente ou ben a través de vías de colaboración con outras administracións, coa finalidade de superar sen máis dilacións nin abandonos ós déficit de seguridade e calidade dos viarios provinciais ao seu paso polo concello de Amoeiro o cal redundará, así mesmo, na fin do estrangulamento nas comunicacións terrestres que persegue, dende fai tantos anos, a este municipio metropolitano.
En Amoeiro, a 24 de febreiro de 2012 |
1 2 3 4 5 6 
